विधे किं कृतम् ?
डॉ. अरविन्दकुमारतिवारी
रचना दिनाङ्क:
०८.०७.२०२०
यं व्यजानां सुबन्धुं स मे बान्धवोऽ-
बान्धवोऽभूद् बली हा विधे ! किं कृतम् ? ।। १ ।।
यं सुशिष्यं व्यजानां स शिष्यो गुरुः ।
जात एवाधुना मे विधे ! कृतम् ? ।। २ ।।
यं व्यजानां स्वमित्रं तु चन्द्रं नवम् ।
जायतेऽसौ शनिः हे विधे! किं कृतम् ? ।। ३ ।।
यं व्यजानां शुकं पञ्जरे पालयन् ।
वायसोऽभूद् वयस्यो विधे ! किं कृतम् ? ।। ४ ।।
यं च वैद्यं व्यजानां सुयोग्यं श्रुतम् ।
सैष रुग्णोऽभवद् हे विधे! किं कृतम् ? ।। ५ ।।
यां व्यजानां निशायां प्रियां स्वां शुभाम् ।
सा करोनाऽभवत् हा विधे! किं कृतम् ? ।। ६ ।।
यं तडागं व्यजानां जलैः पूरयन् ।
द्वेष्टि सैषोऽरविन्दं विधे! किं कृतम् ? ।। ७ ।।
___________*****___________